عندى كلام كتير و مش عارفة ابدأ منين ؟ ابدأ من يوم ما قلتى إنك مسافرة أمريكا 3 شهور تقريبا ، و لّا من يوم ما قلتى إنك جايز ماترجعيش إلا بعد سنين ؟
من يوم ما بدأت أعِد الأيام اللى فاضله عقبال ماترجعى ، و لّا من يوم ماحاولت افتكر كل ذكرى موجودة ليكى عندى عشان مانسهاش ؟!
عارفة …. وانتى فى مصر – حتى لو قعدنا 3 شهور مانشوفش بعض – يوم مانحب نشوف بعض هنعرف بطريقة ما ، إنما أمريكا !!!!!!قد إيه أمريكا بعيدة ! و قد إيه 3 شهور كتير !
أنا ماكنتش أصلا بفكر فى احتمالية إنك ممكن تقعدى هناك … جايز عشان كده لما قلتى إنك غالبا قاعدة هناك ….اتفاجأت … تانى !!
حسيت بحاجات كتير ساعتها .. حسيت إنى مش عارفة افكر … حسيت إن غالبا دى النهاية ….. لو رجعتى يبعد كده هنكون إحنا اتغيرنا و انتى كمان اتغيرتى .
كنتى عايزة رأينا …. كانت جوايا حاجة بتقولى إنى لازم أركن مشاعرى و افكر بعقلى لإن دى حياتك و مستقبلك و مش معقول نفضل رابطينك جنبنا و لو على حساب مستقبلك ، و كانت جوايا حاجة تانية بتقولى إن خلاص … خلاص هتبقى آخر ذكرياتك عنها يوم ماشوفتيها فى سيلانترو قبل ما تسافر و يوم ما اتجمعنا فى البيت … خروجاتنا …أيامنا ، و كل حاجة اتشاركنا فيها …….دول هيفضلوا ، إنما للأسف جايز مايبقاش فى ذكريات أكتر من كده !
عارفة …. كنتى دايما تقوليلى ” انتى الشمعة ” بما إنى غالبا بحاول أكون متفائلة، بس للأسف الشمعة دى ماقدرتش تنور أفكارى الكئيبة وقتها !
فاكرة يوم ما اتجمعنا عندك فى البيت و كلام واحدة فينا خلاكى تعيطى … كان نفسى اقولك ماتزعليش هى ماقالتش كده إلا عشان بتحبك ، و لما سلمت عليكى و انا ماشية و حضنتك .. كان نفسى تحسى بكل حاجة أنا كنت حاسه بيها وقتها من غير ما اتكلم …… كنت حاسه إنك هتوحشينى أوى … هتوحشينى أكتر مما تتخيلى ، و أكتر مما كنت أنا أتخيل إنك ممكن توحشينى فى يوم من الأيام !
برضه مهما حصل هنفضل أصحابك … حتى لو بيننا آلاف الأميال.
و يوم ماتيجى إن شاء الله هنكوم من أكتر الناس اللى مستنيينك
انتى بجد وحشتينا .
عارفة ..كانت دايما حاجة مستفزة إن يكون لينا صاحبتين بنفس الاسم ، بس اللى ماكناش إحنا واخدين بالنا منه إن الموضوع اسوأ بكتير لو واحدة منهم بس هى اللى موجودة !
بعد كده هنتجمع و هنقول الاسم ..واحدة بس هى اللى هترد .. بس جايز ساعتها من غير مانتفق أو نتكلم .. حاجة جوانا تفتكرك و تتمنى لو كنتى موجودة معانا ، و جايز وقتها … نمر على بالك .
بجد وحشتينا و هتوحشينا .
Category: أفكار مبعثرة
الانتخابات الأمريكية قد بدات ، و الرئيس الجديد يوشك أن يطرق أبواب البيت الأبيض
أوباما أم ماكين
معظمنا ينحاز لأوباما بسبب أصوله المسلمة الإفريقية ربما و لكن من يدرينا أن أصوله هذه لن تكون وبالا علينا ،و من يدرينا أنه لن يعمل على الضغط علينا و التنكيل بنا أكثر مما هو موجود الآن حتى يثبت لشعبه أنه منتمى إليهم قلبا و قالبا و يتبرأ من أصوله المنتمية إلى العالم الثالث ؟
من يدرى ؟
و لكن ربما هو التشبث بالأمل الذى قد يجعل أوباما أفضل من ماكين الذى وافق على حرب العراق كما سمعت
لعله خير
ربنا يستر
1- مؤتمر الحسب الوطنى
بقالى يومين اشوف التصريحات العظيييمة و اسكت …و اشوفها و اطنش ، و اقول يا بنتى استهدى بالله كده ، بس خلاص بقى مش قادرة .
ما هو يا الناس دى بتستهبل و فاكرة إن إحنا مصدقينها و دى تبقى مصيبة ،
يا إما بتستهبل و عارفة إن إحنا مش مصدقينها و دى تبقى كارثة .
بعض التصريحات ( اللظيظة):
جمال مبارك : الحزب الوطنى لا يدلل رجال الأعمال و لا يتستر على فساد
لا نريد الدولة المسيطرة …. و إنما نريد الدولة المحفزة
صفوت الشريف : توفير الحماية الاجتماعية للفقراء و محدودى الدخل و تحقيق العدالة فى توزيع ثمار التنمية
لن تضيق صدورنا بمعارض و لن نغلق عقولنا أمام رأى و لا نستجيب لثقافة الكراهية أو المؤامرة
هسيبكم التعليق على التصريحات الفظيعة دى عشان ميجراليش حاجة
حرام عليكوا بقى اللى بتعملوه فى مصر ده !!!!!!!!!!!!!!!1
تدوينتان فى يوم واحد !!!!!!!! كده كتير مش كده ؟؟
المهم يعنى
مين فينا مسمعش عن الازمة المالية فى الولايات المتحدة الأمريكية و ما تبعها من انهيار للبورصات العالمية ،
طبعا انا ماكنتش فاهمة حاجة ف الموضوع ده و لسه برضه مش فاهمة اوى ، بس يعنى ممكن اقولكوا اللى انا سمعتوا عن الموضوع ده .
على حسب ما فهمت يعنى ، إن البنوك ف أمريكا مش تحت سيطرة الدولة و ده تبعا لمبادئ الرأسمالية _ربنا يخلى لينا الحكومة اللى ماسكة البنوك بتاعتنا _
و بما إن البنوك ف أمريكا بتقوم بنشاط كبير فى الإقراض و أسواق العقارات ، و الظاهر إن حصل إقراض و كده من غير ضمانات بسبب فساد حصل ف البنوك هناك ، وده خلى بعض البنوك الكبيرة هناك أفلست مما تسبب بخلل الاقتصاد الأمريكى و جعل الحكومة تقوم الآن بضخ مليارات الأموال لإصلاحه ، طيب ليه لما الاقتصاد الأمريكى تخلخل بقية البورصات العالمية تأثرت ؟؟ اعتقد ده حصل بسبب العولمة التى جعلت من العالم متداخل فى الاتفاقيات التجارية …إلخ إلخ .
طيب لما طلع حد من حكومتنا العزيزة و قال إن إحنا مش هنتأثر تأثير مباشر ، على حسب ما فهمت إن إحنا فعلا ممكن ما نتأثرش مباشرة بشكل ملحوظ لإن عندنا الحكومة تسيطر على البنوك بشكل كبير عن طريق View full article »
منذ بضعة أيام ، برنامج (الحقيقة ) لوائل الإبراشى كان يتكلم عن كارثة عبارة السلام (98) ، لم أشاهده كاملا .. فقط مقتطفات ، و كانت تكفى .
رجل- فى عمر جدى ربما- يبكى أهله المفقودون و يروى مأساته ،
و شخص …. مجرد شخص لم تراعى لوعته على زوجته و أبناؤه الأربعة الذين فقدهم فى العبارة التى أُعطى صاحبها حكما بالبراءة و ببساطة شديدة ،
أب هو …آلمنى كلامه …و أبكانى حين قال ان اسرته كانت تريد السفر فى هذا اليوم لأن ابنه يريد أن يحمل العلم المصرى بعد مباراة السنغال و مصر فى كأس الأمم الإفريقية ، كان الابن يريد أن يحضر الاحتفال فى مصر …بين المصريين ..حاملا علم بلاده التى اشتاق إايها ، لم يكن يعلم أنه لن يصل إلى مصر ، هذا قضاء الله و هذا ليس اعتراضا على قضاء الله -معاذ الله- ، بل هو اعتراض على أن يأخذ صاحب العبارة حكما بالبراءة ، أنا لست قاضية و لا افهم فى القانون و لا القضاء و لا اشكك فى نزاهة القضاة ، و لكن ما اعرفه أنه من يتسبب بقتل أنفس بسبب إهماله لعباراته التى اصبحت خارج نطاق الخدمة , يجب أن يأخذ جزاؤه على الأقل لأنه اهتم بجمع الأموال عن حماية أرواح الناس.
—————————————————
حريق بنى سويف
كارثة السلام (98)
تمديد العمل بقانون الطوارئ
انهيار صخرة الدويقة
حريق مجلس الشورى
حريق المسرح القومى
اختطاف السياح
اعتقد إن فى حاجة غلط ؟؟ إمال ليه الحكومة مش واخدة بالها ؟؟؟؟؟؟؟
1-الأمم المتحدة تؤكد مقتل 60 طفلا افغانيا فى غارة أمريكية (المصرى اليوم)
60 طفل فى غارة أمريكية !!!!!! …… أليست هذه أمريكا راعية حقوق الإنسان ؟؟؟؟
2- البهائيون ورقة ضغط على مصر (المصرى اليوم )
و هو فى حاجة بقت مش ورقة ضغط على مصر ؟؟؟؟ إلا طبعا المعونة الأمريكية و اتفاقية السلام و الاتفاقيات التجارية و ضرورة التطبيع و المسيحيون و حقوق الإنسن و حقوق الحيوان و الديمقراطية و ….و…و….و…. و لا حاجة … مش كده؟؟
3-وزارة الدفاع الاسرائيلية:تل أبيب كلها أصبحت فى مرمى صواريخ اعدائها (المصرى اليوم)
يا عينى على الغلابة !!!!!!!!! ….. إنهم معرضون للهجوم فى كل وقت !!! ….مش جايز عشان كده بنصدر لهم غاز مدعم؟؟؟
4-رئيس المجلس الأعلى للشباب : اللى عايز يروح اسرائيل و يتجوز هو حر (الدستور)
مش واخدة بالى ؟؟؟ هى البلد دى مش بلدنا و بلدهم و لا إيه؟؟
5-مؤذن الاوقاف…دجال (روز اليوسف)
أهذا ينتمى لازدواجية المعايير السائدة فى مجتمعاتنا أحيانا؟
6-إخماد حريق بمصنع طوب بالغربية إثر انفجار20 انبوبة بوتاجاز (روز اليوسف)
حريق تااااااانى ؟؟!!!!!! يارب ارحمنا
7-لجنة دائمة فى مجلس الوزراء لمراجعة نظم الامان بالمنشآت الحكومية (الأهرام)
لا لسه بدرى !! و ليه مستعجلين بس ؟؟ لسه لا مجلس الشعب اتحرق و لا مبنى وزارة ولّع و لا البرج جراله حاجة ؟؟ ليه التشاؤم ده بس ؟
ربنا هيستر إن شاء الله ….لا حول و لا قوة إلا بالله
*الأهرام (28 اغسطس2008)
واصلت أجهزة الاطفاء عملها فى حريق مبنى مجلس الشورى , حيث لا تزال النيران مشتعلة تحت الانقاض فى المخازنو قد استخدم رجال الاطفاء خراطيم المياه بكثافة لضمان وصول المياه إلى المناطق المشتعلة. و قد بدأت الاوناش العملاقة التابعة لشركة المقاولون العرب نشاطا ضخما فى رفع الانقاض المتخلفة عن الحريق, و تضم كمرات حديدية تزن الواحدة منها عدة أطنان , إلى جانب العروق الخشبية المستخدمة فى اسقف المبنى التى احترقت اجزاء منها و هى مخلفات لا تقدر على رفعها الافراد او الاوناش العادية.
نيران مازالت مشتعلة ؟؟؟
8-مصر تطالب اسرائيل بوقف تهديداتها المتكررة ضد لبنان ( الاهرام)
و اكيد اسرائيل لمّا سمعت كده خافت و اوقفت التهديدات ؟؟ مش كده !!
1- حين تحدث ضجة كبيرة على امتحان الفيزياء للثانوية العامة و العديد من الجهات تقول إنه صعب و تأتى نسبة النجاح فيه واحد و تسعون بالمائة و كسر , فى حين أن امتحان الكيمياء لنفس العام و الذى قيل إنه سهل و مقبول تأتى نسبة النجاح فيه سبعون بالمائة و شوية …….ببساطة …..كيف جاؤا بهذه النسب؟
2- ذاهب فى تاكسى ناحية قاعة المؤتمرات فى مدينة نصر و الطريق مزدحم للغاية و تسمع هذا الحوار
أنا : هو الطريق زحمة ليه كده ؟
سائق التاكسى : بيقولوا الريس رايح القاعة النهاردة
أنا : ليه ؟
سائق التاكسى : بيحتفل ب 6 اكتوبر
أنا فى سرى : بيحتفل ب6 أكتوبر يوم 3 اكتوبر ؟؟؟؟!!!
3- حين تشعر أن استقالة أحدهم من الحكومة ………..تهمة
4- حين تجد أن وطنك به العديد من مصادر الدخل و لكن …….لا نقود تصل للشعب
5- حين يكون مرتب شخص ما 100 جنيه فى حين أن كيلو اللحمة ب 50 جنيه
6- حين يتم القبض على بعض الشباب الذين يهتفون بأغانى وطنية لمصر على شاطئ الاسكندرية احتفالا ب 23 يوليو
7- و فى نفس الوقت يصدر حكم البراءة لصاحب العبارة التى غرق على متنها أكثر من ألف شخص
8- حين يُلقى شباب البلد بأنفسهم فى البحر لعلهم يصلون لشاطئه الآخر باحثين عن عمل يوفر لهم حياة كريمة
9- حين يطالبك أحدهم أن تحب الحكومة لكى يعنى ذلك انتماءك للبلد
10- حين تشعر أن ما يقوله رجال الحكومة عن الناس فى وادى و ما تراه من حولك فى واد آخر تماما و كأنهم يتكلمون عن وطن غير وطنك
11- حين تجد الفقر فى انتشار و تسمع أن الحكومة تصدر الغاز المُدَعم لاسرائيل
12- حين تشعر إن خلاص اسرائيل أصبحت من بقية أهلنا
13- حين تجد شخصا ما ينتظر فى طابور العيش 3 ساعات و حين ياتى دوره يخبروه أن العيش خلص
14- حين ترى إشاعات أو حقائق تتناثر عن التوريث ….فى بلد جمهورى
15- لمّا مبنى أثرى يتحرق و عمره 100 سنة و تفضل النار مولعة فيه أكتر من 6 ساعات
هل قرأت هذه النقاط؟
معذرة … أعد قرائتهم
و ابكِ…… أنت فى مصر
( و كم ذا بمصر من المضحكات ….. و لكنه ضحك كالبكاء ) المتنبى
(الإنسان كائن اجتماعى بطبعه , يتأثر بالبيئة التى يعيش فيها و يؤثر فيها) و لهذا فمن الطبيعى أن تؤثر الثانوية العامة التى خرجت منها حديثا فى بعض ما اكتبه ، هذه ليست قصة بل هو فقط مشهد قد يكون ساخر….. و قد يكون مبكى ,إليكم المشهد لتحكموا بأنفسكم .
إهداء: إلى طلبة الثانوية العامة علمى 2007|2008
اثنان من الطلبة هم الأبطال لنسميهم سامر و مازن
((((( 1)))))
أمام اللجنة صباحا
سامر: مازن بقولك هو انت مذاكر الفيزيا كويس و لا إيه النظام؟
مازن: عيب يا بنى , ايوه مذاكرها كويس إن شاء الله
سامر: يبقى تظبطنى ….فاهم؟
مازن : طب اسكت بس دلوقتى
((((( 2 ))))
سامر: مازن ..انت يا بنى هى إيه إجابة السؤال التانى ؟
مازن: حلّها بقوانين أرشميدس
سامر :اتنيل على عينك هو أنا عارف أرشميدس ده بيقول إيه؟؟؟
((((((( 3 )))))))
سامر :طب و إجابة السؤال التانى …المسألة هتتحل إزاى؟؟
مازن : مش عارف
سامر: نعم ياخويا !!!!!!! مش عارف إزاى يعنى؟
مازن : يعنى مش عارف أحّلها
((((( 4 ))))))))
سامر : عرفت تحل المسألة ؟
مازن : لأ
سامر :إمال عامل فيها مذاكر و بتاع !!!!!!!
مازن : يا بنى انا مذاكر بس مش عارف احلها
((((((( 5 ))))))
سامر : هو الامتحان زفت و لا أنا بس اللى مش فاهم حاجة؟؟؟
مازن : لأ هو زفت
سامر : يا بنى أنا حاسس إن الاسئلة عجيبة !!
مازن : هى فعلا عجيبة
سامر : طب و العمل؟؟؟؟؟
مازن : ربنا يستر
((((( 6 ))))
سامر: مازن….مازن….مااااازن
مازن:…………………..
سامر : ماااااااازن
مازن :………………..
سامر :……………….
((((( 7))))))
اللجنة سايبة و الناس عمالة تتكلم و بتحاول تحل الاسئلة
((((((8)))))))))))
آخر دقائق فى اللجنة و هناك بعض الطلبة الذين لا يفعلون شيئا سوى النظر فى أوراق الإجابة
((((((( 9 ))))))))
رن الجرس معلنا نهاية اللجنة
((((( 10 )))))))
خارج باب المدرسة….. البعض يبكى …. البعض منهار …..البعض يضحك ….و البعض لا يفعل شئ
((((((( 11 )))))))))))
امتحان فيزياء الثانوية العامة المصرية 2008
إمضاء : وزارة التربية و التعليم المصرية
و تأتى نسبة النجاح فوق 90 % ….كيف جاؤا بها هكذا ؟
و لماذا فعلوا بنا هذا ؟ من المخطئ ؟ نحن أم هم ؟ و من الذى عليه تحمل نتيجة الخطأ ؟
اسئلة تطرح نفسها.
